निजी क्षेत्रलाई विश्वासमा लिएर काम नगरे विकास दिवास्वप्न : प्रचण्ड

चितवन । पूर्वप्रधानमन्त्री तथा नेकपाका अध्यक्ष पुष्पकमल दाहाल ‘प्रचण्ड’ले निजी क्षेत्रलाई विश्वासमा लिएर काम गर्न नसके विकास दिवास्वप्न हुने बताउनुभएको छ । 
लगानी केन्द्रीकृत गर्नको लागि आज भरतपुरमा भएको निजी क्षेत्रसँग अन्तक्र्रिया कार्यक्रमको उद्घाटन गर्नुहुँदै पूर्वप्रधानमन्त्री प्रचण्डले भन्नुभयो, ‘सरकारले निजी क्षेत्रसँग इमान्दारिता प्रस्तुत गर्नुपर्छ, विश्वासमा लिन सक्नुपर्छ, नत्र विकास र समृद्धिको सपना नदेख्दा पनि हुन्छ ।’ उहाँले विगतका समयमा सरकार र निजीक्षेत्रको दुरी नजिक हुन नसकेको बताउनुभयो । 
कार्यक्रममा उहाँले भन्नुभयो, ‘विगतको समयमा सरकार निजी क्षेत्रलाई दुहुनो गाईको रुपमा लियो, यिनीहरु ठग नै हुन् भन्नेमा गयो । निजी क्षेत्र पनि कताबाट हुन्छ, कर छल्नतर्फ उन्मुख भयो जसको कारण विकास अगाडि बढ्न सकेन ।’ उहाँले अहिलेको वातावरण विल्कुल फरक रहेको बताउनुभयो । कार्यक्रममा उहाँले भन्नुभयो, ‘निजी क्षेत्र र सरकार दुबैले इमान्दारी देखाउन आवश्यक छ, दुबै सँगसँगै हिँड्न आवश्यक छ, तबमात्र देशको विकासले गति लिन्छ ।’
अध्यक्ष प्रचण्डले लगानीमैत्री र विकासमैत्रीतर्फ ध्यान गएको बताउनुभयो । कार्यक्रममा उहाँले भन्नुभयो, ‘१०४ वर्ष राणाशासनमा पनि केन्द्रीय शासन, पछिल्लो ७० वर्ष पनि केन्द्रीय शासन तर देशको विकासले गति लिएन । अबको शासन फरक हो, घरघरमा सरकार पुगेको छ ।’ 
अहिलेको परिवर्तन ७ सालको, १७ सालको ४६ सालको जस्तो नभएको उहाँले बताउनुभयो । कार्यक्रममा उहाँले अहिले संघीय शासन कताकता कमजोर हुँदै जाने हो कि भन्ने चिन्ता आफूलाई लागेको बताउनुभयो । उहाँले भन्नुभयो, ‘यसलाई कमजोर पार्नुहँदैन, पार्न दिनुहुँदैन, यसलाई मजबुद बनाउनुपर्छ । प्रदेश ३ ले जुन कार्यक्रम गरेर संघीयता बलियो बनाउन खोजेको छ, यो सह्रानीय हो ।’
उहाँले हाम्रा बाबुबाजेले खाद्यान्न निर्यात गर्थे, तर अहिले आयत भइरहेको बताउँदै भन्नुभयो, ‘अबको शिक्षा पनि प्रविधिमैत्री बनाउनुपर्छ ।’