सार्वजनिक यातायातको अवस्था सुधार गर्न रास्वपा सांसद गजुरेलको माग

काठमाडौँ । रास्वपा सांसद आशिष गजुरेलले सार्वजनिक यातायात सेवा अझ व्यवस्थित, सुरक्षित र यात्रुमैत्री बनाउन सरकारको ध्यानाकर्षण गराएका छन्।

प्रतिनिधि सभाको बैठकको शून्य समयमा धारणा राख्दै उनले सार्वजनिक सवारीसाधनमा यात्रुले भोग्नुपरेको भिडभाड र असहज अवस्थाप्रति चिन्ता व्यक्त गरे।

सांसद गजुरेलले ठुलो सङ्ख्यामा नागरिक दैनिक रूपमा सार्वजनिक यातायातमा निर्भर रहनुपर्ने अवस्था रहेको उल्लेख गर्दै यात्रुहरूले सम्मानजनक र सहज यात्रा गर्न पाउनुपर्ने बताए।

उनका अनुसार ४० प्रतिशतभन्दा बढी नेपाली नागरिकको आवतजावत सार्वजनिक यातायातमार्फत हुने गरेको छ। यस्तो अवस्थामा सेवा व्यवस्थापन, सुरक्षा, विश्वसनीयता तथा यात्रुको सुविधा सुनिश्चित गर्न आवश्यक नीतिगत र व्यवस्थापकीय सुधारमा सरकारले प्राथमिकता दिनुपर्ने उनको भनाइ थियो।