गगन थापाको अभिव्यक्तिप्रति पूर्णबहादुर खड्काकाे आपत्ति

काठमाडौँ । नेपाली कांग्रेसका नेता पूर्णबहादुर खड्काले सभापति गगन थापाको अभिव्यक्तिप्रति आपत्ति जनाएका छन् ।

सभापति थापाले गण्डकी प्रदेशस्तरीय भेलामा बोल्दै वडा सभापतिले सदस्यता अद्यावधिकको काम नगरे अर्कोलाई जिम्मा दिने चेतावनी दिएका थिए ।

त्यसप्रति नेता खड्काले कर्णाली प्रदेशको आयोजनामा नेपाली कांग्रेस बृहत्तर एकता र भावी कार्यदिशा विषयक विचार गोष्ठीलाई सम्बोधन गर्दै आपत्ति जनाएका हुन् । उनले थापाले आफ्नो गल्ती अझै नस्वीकारेको भन्दै असन्तुष्टि जनाए ।

उनले भने, ‘उहाँले पनि गल्ती स्वीकारे म खुसी नै हुन्छ । तर अस्ति गण्डकीमा सुने, पार्टीका नेताहरूलाई लल्कारिराख्नुभएकाे छ । पार्टीको वडा सभापतिले अद्यावधिकको काम नगरे अर्को मान्छेलाई तोक्दिन्छु, यही हो नेपाली कांग्रेस पार्टी ? लोकतान्त्रिक पार्टी ?’

उनले आफूबाट भएको गल्ती स्वीकार्न तयार भएको बताउँदै विशेष महाधिवेशनकै कारणले कांग्रेस ३८ सीटमा खुम्चिएको जिकिर गरे ।

उनले भने, ‘निर्णय प्रक्रियामा केही गल्ती भएको रहेछ भने म स्वीकार्न तयार छु। कांग्रेसको विशेष महाधिवेशनकै कारणले रास्वपाले दुई तिहाइ मत पाएको हो, अहिले प्रधानमन्त्री अधिनायकवादी सोचका साथ हिँड्न थाल्नुभएको छ ।’