शिक्षा क्षेत्र सुधारमा सरकार प्रतिबद्ध रहेको शिक्षामन्त्री पोखरेलको दाबी

मंगलबार सिंहदरबारमा बसेको शिक्षा, स्वास्थ्य तथा सूचना प्रविधि समितिको बैठकमा सांसदहरूले उठाएका प्रश्नहरूको जवाफ दिँदै उनले शिक्षा प्रणाली सुधारलाई प्राथमिकतामा राखेर काम अघि बढाइएको स्पष्ट पारे।

उनका अनुसार इन्धन अभाव तथा मन्त्रिपरिषद्को निर्णयका कारण यस वर्ष शैक्षिक सत्र वैशाख १५ गतेदेखि सुरु गरिएको हो। साथै सर्वोच्च अदालतको अन्तरिम आदेशका कारण भर्ना तथा पठनपाठन तालिकामा केही समायोजन गरी २१ वैशाखदेखि नियमित कक्षा सञ्चालन गरिएको उनले जानकारी दिए।

मन्त्री पोखरेलले आइतबारको बिदा र क्रेडिट आवर सम्बन्धी विषयमा तयार पारिएको कार्यदल प्रतिवेदन कार्यान्वयनका लागि काठमाडौँ, ललितपुर महानगरपालिका तथा अन्य स्थानीय तहका प्रतिनिधिसँग छलफल भइरहेको बताए।

विद्यालय शुल्क नियमन गर्ने अधिकार स्थानीय तहमा रहेको उल्लेख गर्दै उनले तोकिएको सीमा भन्दा बढी शुल्क लिने शैक्षिक संस्थामाथि आवश्यक कारबाही हुने चेतावनी दिए।