‘हर्क साम्पाङसँग एकता सम्भावनाबारे छलफल जारी’ : कुलमान घिसिङ

काठमाडौँ । कुलमान घिसिङ नेतृत्वको उज्यालो नेपाल पार्टी र हर्क साम्पाङ नेतृत्वको श्रम संस्कृति पार्टीबीच राजनीतिक एकताबारे प्रारम्भिक छलफल भइरहेको बताइएको छ ।

काठमाडौँमा सञ्चारकर्मीहरूसँग कुराकानी गर्दै घिसिङले नयाँ राजनीतिक शक्तिहरूबीच सहकार्य वा एकताको सम्भावना स्वाभाविक प्रक्रियाअन्तर्गत रहेको धारणा व्यक्त गरे । उनका अनुसार पार्टीगत सहकार्य, कार्यगत तालमेल वा पूर्ण एकताको विषय परिस्थितिअनुसार अघि बढ्न सक्छ ।

उनले आगामी स्थानीय तहको निर्वाचनमा आफ्नो पार्टीले उल्लेखनीय उपस्थिति देखाउने तयारी भइरहेको पनि बताए । “विभिन्न विकल्प खुला छन्-एकता हुन सक्छ, सहकार्य हुन सक्छ वा स्वतन्त्र रूपमा पनि अघि बढ्न सकिन्छ,” उनले भने ।

घिसिङका अनुसार हर्क साम्पाङको पक्षबाट एकता सम्बन्धी प्रस्ताव आएको छ र त्यस विषयमा छलफल जारी रहेको छ । वार्ता प्रक्रिया रोकिएको नभई निरन्तर संवादमा रहेको उनले स्पष्ट पारेका छन् ।