सरकारलाई हर्क साम्पाङको खुला पत्र: "काम गर्न नसके मार्ग प्रशस्त गर"

काठमाडौँ । प्रतिनिधि सभा सदस्य तथा श्रम संस्कृति पार्टीका अध्यक्ष हर्क साम्पाङले सरकारको कार्यशैलीप्रति आपत्ति जनाउँदै एक खुल्ला पत्र लेखेका छन् ।

उनले सामाजिक सञ्जालमार्फत संसदलाई छलेर सरकार चलाउन खोजिएको आरोप लगाउँदै सीमा सुरक्षा, अर्थतन्त्र र सुकुम्वासी समस्यामा सरकार निकम्मा बनेको दाबी गरेका छन् । साम्पाङले विशेष गरी लिपुलेक क्षेत्रमा भारतले कैलाश मानसरोवर जोड्ने सडक निर्माण गरिरहँदा सरकार केवल कूटनीतिक नोटमा सीमित भएको भन्दै आक्रोश पोखेका छन् ।

उनले यो समस्या समाधानका लागि नेपाल, भारत, चीन र संयुक्त राष्ट्र संघ सम्मिलित चतुर्पक्षीय वार्ताको माग गर्दै सीमा रक्षाका लागि सेनालाई सीमामै खटाउनुपर्ने अडान राखेका छन् ।

विदेशी ऋण लिएर देश डुबाउने कार्य तुरुन्त रोक्न उनले माग गरेका छन्। राज्यलाई सन्तुलनमा राखेर सञ्चालन गर्न नसक्ने हो भने राजीनामा दिएर मार्ग प्रशस्त गर्नुपर्छ पत्रमा लेखिएको छ।