विकल पौडेल दम्पतीविरुद्ध करिब ६९ करोड रुपैयाँ बराबर सम्पत्ति शुद्धीकरण मुद्दा दायर

काठमाडौँ । राजस्व अनुसन्धान विभागले सुरक्षण मुद्रण केन्द्रका तत्कालीन कार्यकारी निर्देशक विकल पौडेल र उनकी श्रीमती एलिना बस्नेतविरुद्ध करिब ६९ करोड रुपैयाँ बराबरको बिगो दाबी गर्दै सम्पत्ति शुद्धीकरणसम्बन्धी मुद्दा दायर गरेको छ।

विभागले बुधबार काठमाडौँ जिल्ला अदालत, बबरमहलमा अभियोगपत्र दर्ता गरेको हो। विभागका निर्देशक सचितकुमार वाइवाका अनुसार कुल ६८ करोड ९४ लाख ६५ हजार रुपैयाँ बराबरको बिगो कायम गरी मुद्दा अघि बढाइएको छ।

अभियोग अनुसार विकल पौडेलमाथि ६१ करोड १३ लाख २१ हजार १५३ रुपैयाँ र उनकी श्रीमती एलिना बस्नेतमाथि ७ करोड ८१ लाख ४४ हजार ५१ रुपैयाँ बराबरको अवैध सम्पत्ति शुद्धीकरण गरेको दाबी गरिएको छ।

विभागले सम्पत्ति शुद्धीकरण (मनी लाउन्डरिङ) निवारण ऐन, २०६४ को दफा ३ अन्तर्गतका विभिन्न उपदफामा उल्लेखित कसुर भएको आधारमा मुद्दा दायर गरिएको जनाएको छ।

यसअघि विदेशी विनिमय अपचलनसँग सम्बन्धित विषयमा ६२ करोड ६५ लाख ९१ हजार ८९३ रुपैयाँ बिगो कायम गरी २०८१ असोज १४ गते नै जिल्ला अदालत काठमाडौँमा अर्को मुद्दा दर्ता गरिएको थियो।

उक्त अनुसन्धानका क्रममा संकलित प्रमाणहरूको विश्लेषणपछि थप सम्पत्ति शुद्धीकरणसम्बन्धी कसुर पनि पुष्टि भएको विभागले जनाएको छ।