हुम्लामा तीन दिनदेखि हवाई सेवा प्रभावित

काठमाडौँ । हिमाली जिल्ला हुम्लामा लगातार वर्षा र हिमपातका कारण तीन दिनदेखि हवाई सेवा सञ्चालनमा रोकावट आएको छ।

नेपाल नागरिक उड्डयन प्राधिकरण, सिमकोटका अनुसार मंगलबारदेखि खराब मौसमका कारण उडानहरू नियमित रूपमा सञ्चालन हुन सकेका छैनन्।

नेपाल एयरलाइन्सले मंगलबार र बुधबार उडान तालिका तयार गरेको भए पनि मौसम प्रतिकुल हुँदा उडानहरू स्थगित भएका हुन्। बिहीबारसम्म पनि वर्षा र हिमपात जारी रहँदा उडान सञ्चालन हुने सम्भावना न्यून रहेको प्राधिकरणले जनाएको छ।

हवाई सेवा अवरुद्ध भएपछि सिमकोट-नेपालगन्ज मार्गका यात्रु प्रभावित भएका छन्। विशेष गरी स्वास्थ्य संस्थाहरूले रिफर गरेका बिरामीहरू असुविधामा परेका छन्। प्राधिकरणका एक अधिकारीले बताएअनुसार, मौसम प्रतिकुलता र नेपालगन्जमा निजी एयरलाइन्सका जहाजहरूको सीमित उपलब्धताका कारण आगामी सोमबारसम्म नियमित उडान सञ्चालन हुने सम्भावना कम छ।

गत सोमबार मात्रै नेपाल एयरलाइन्सको एउटा उडान हुम्लामा सफलतापूर्वक सञ्चालन भएको थियो।