पूर्वमन्त्री न्यौपानेसहित तनहुँका २२ उम्मेदवारको जमानत जफत

काठमाडौँ। प्रतिनिधि सभा सदस्य निर्वाचनअन्तर्गत तनहुँका दुई निर्वाचन क्षेत्रमा कुल २२ उम्मेदवारको चुनावी जमानत जफत भएको छ। जमानत गुमाउनेमा नेकपा (एमाले)बाट तनहुँ-१ मा प्रतिस्पर्धा गरेकी पूर्वमन्त्री भगवती न्यौपाने पनि परेकी छन्।

निर्वाचन कानुनअनुसार खसेको सदर मतको कम्तीमा १० प्रतिशत मत प्राप्त गर्न नसक्ने उम्मेदवारले धरौटीबापत बुझाएको रकम फिर्ता पाउँदैनन्। तनहुँ-१ मा ६८ हजार १४९ मत खसेकोमा ६५ हजार ४१९ मत सदर भएको थियो। पूर्वमन्त्री न्यौपानेले ५ हजार ८३० मत प्राप्त गरेपछि उनको जमानत जफत भएको हो।

यस क्षेत्रमा कुल १६ जना उम्मेदवार प्रतिस्पर्धामा थिए। तर निर्वाचित राष्ट्रिय स्वतन्त्र पार्टी ९रास्वपा०का स्वर्णिम वाग्ले र उनका निकटतम प्रतिद्वन्द्वी नेपाली काँग्रेसका गोविन्द भट्टराईले मात्रै जमानत जोगाएका छन्। वाग्लेले ३८ हजार ४० मत प्राप्त गर्दै विजय हासिल गरेका थिए भने भट्टराईले १६ हजार २३१ मत पाएका थिए।