कमेडी च्याम्पियनमा ‘प्रचण्ड’ र रेनुलाई व्यंग्य गरिएकोप्रति जेन जेड जेड फोर्सले जनायो आपत्ति

काठमाडौँ । जेन जेड रेड फोर्स नेपालले टेलिभिजन हास्य कार्यक्रम टिभी रियालिटी शो कमेडी नाइट विथ च्याम्पियन्सको एक अंशप्रति आपत्ति जनाएको छ।

कार्यक्रममा गरिएको प्रस्तुतीकरणले राजनीतिक नेतृत्वप्रति अनुचित संकेत गरेको भन्दै संगठनले औपचारिक प्रतिक्रिया सार्वजनिक गरेको हो।

उक्त कार्यक्रमको ४७औँ भागको ट्रेलर सार्वजनिक भएपछि विवादित अंश सार्वजनिक भएको थियो। ट्रेलरमा बाल कलाकार सुयसा खनालले रेनु दाहालको चरित्र अभिनय गरेको दृश्य समावेश छ।

सो क्रममा कार्यक्रम प्रस्तोताले सोधेको प्रश्नको उत्तरमा प्रयोग गरिएको संवादले पुष्पकमल दाहाल ‘प्रचण्ड’प्रति व्यंग्य गरिएको अनुभूति भएको संगठनको धारणा छ।

संगठनले जारी गरेको वक्तव्यमा उक्त सामग्रीले कम्युनिस्ट आन्दोलनसँग सम्बन्धित नेतृत्वको योगदान र ऐतिहासिक भूमिकालाई हल्का रूपमा प्रस्तुत गरेको ठहर गर्दै गम्भीर ध्यानाकर्षण भएको जनाएको छ। सार्वजनिक व्यक्तित्वसँग सम्बन्धित विषय प्रस्तुत गर्दा न्यूनतम संवेदनशीलता र जिम्मेवारी अपेक्षित रहने उल्लेख पनि गरिएको छ।

वक्तव्यमा हास्य–व्यंग्य विधा दर्शकलाई मनोरञ्जन प्रदान गर्ने उद्देश्यले तयार गरिने भए पनि अभिव्यक्ति स्वतन्त्रताको प्रयोग गर्दा सन्तुलन कायम गर्नुपर्नेमा जोड दिइएको छ। आगामी दिनमा यस्ता विषय प्रस्तुत गर्दा सम्बन्धित पक्षको योगदान र संवेदनशील पक्षलाई ध्यानमा राख्दै जिम्मेवार ढंगले सामग्री निर्माण गर्न आग्रह गरिएको छ।