पूर्वमन्त्री जितेन्द्र देवले गरे एमाले परित्याग गरेको घोषणा

काठमाडौँ । संविधान सभा सदस्य तथा पूर्वमन्त्री जितेन्द्र देवले नेकपा (एमाले) बाट अलग भएको घोषणा गरेका छन्। उनले सार्वजनिक रूपमा जारी गरेको लिखित जानकारीमार्फत आफू अब उक्त दलसँग आबद्ध नरहेको स्पष्ट पारेका हुन्।

पार्टीभित्र पछिल्लो समय देखिएको नेतृत्व केन्द्रित सोच, व्यक्ति विशेषको महिमाकरण, निर्णय प्रक्रियामा स्वेच्छाचारिता तथा व्यवहारगत विभेदसँग आफू सहमत हुन नसकेको कारण दल परित्याग गर्ने निष्कर्षमा पुगेको उनको दाबी छ ।

देव लामो समयसम्म एमालेको राजनीतिक संरचनामा सक्रिय थिए। त्यसपछि उनी विजयकुमार गच्छदारको नेतृत्वमा रहेको मधेशी जनअधिकार फोरम (लोकतान्त्रिक) मा सहभागी भई संविधान सभा सदस्य बनेका थिए।

उक्त दल नेपाली काँग्रेसमा समाहित भएपछि देव पनि काँग्रेसमै आबद्ध भएका थिए। काँग्रेसको तर्फबाट उनले राष्ट्रिय सभामा प्रतिनिधित्व गर्ने अवसरसमेत प्राप्त गरेका थिए।

राष्ट्रिय सभा सदस्यको कार्यकाल २० फागुन २०८० मा समाप्त भएपछि देव १७ असार २०८१ मा पुनः एमालेमा फर्किएका थिए। तर हाल पुनः उनले एमालेसँगको राजनीतिक सम्बन्ध अन्त्य गरेको औपचारिक जानकारी दिएका छन्।