भावी प्रधानमन्त्रीका उम्मेदवारूबीच सार्वजनिक बहस गराऊँ : उदय शमशेर राणा

काठमाडौं । नेपाली कांग्रेसका सहमहामन्त्री तथा ललितपुर क्षेत्र नम्बर २ बाट प्रतिनिधिसभा सदस्य उम्मेदवार उदय शमशेर राणाले प्रधानमन्त्रीका भावी उम्मेदवारहरूलाई एउटै मञ्चमा राखेर सार्वजनिक बहस गर्न प्रस्ताव गरेका छन्।

उनले आज बिहान सामाजिक सञ्जालमार्फत यसपटक अधिकांश प्रमुख दलहरूले निर्वाचनअघि नै भावी प्रधानमन्त्रीका उम्मेदवार घोषणा गरिसकेको उल्लेख गर्दै नागरिकमा स्वाभाविक जिज्ञासा रहेको बताएका छन् ।

देश निर्माणका ठोस नीति, योजना र कार्यक्रमबारे खुला बहस आवश्यक भएको उनको भनाइ छ ।

अर्थतन्त्र, रोजगारी, शिक्षा, स्वास्थ्य र सुशासनका विषयमा प्रधानमन्त्रीका उम्मेदवारहरूको स्पष्ट दृष्टिकोण सार्वजनिक बहसमार्फत नागरिकसमक्ष आउनुपर्ने राणाको तर्क छ।

यस्तो बहसले मतदातालाई उम्मेदवारलाई नजिकबाट बुझ्ने अवसर दिने र विवेकपूर्ण मतदानमा सहयोग पुग्ने उनले बताए। ‘बहसले लोकतन्त्र बलियो हुन्छ, प्रश्नबाट कोही नभागौँ’, राणाले लेखेका छन् ।

उनले नेपाली कांग्रेस यस्तो बहसका लागि तयार रहेको स्पष्ट गर्दै अन्य दलहरूलाई पनि तयारी छ कि छैन भनेर चुनौती दिएका छन् ।