रवि कारागारबाट बाहिरिएपछि पुराना दलहरू आत्तिए : रास्वपा

काठमाडौँ । राष्ट्रिय स्वतन्त्र पार्टी (रास्वपा)का नेता गणेश पराजुलीले देशमा विद्यमान पुराना राजनीतिक दलहरूको सिन्डिकेट तोड्न सबै वैकल्पिक शक्तिहरू एकजुट हुनुपर्ने बताएका छन्।

बर्दिया जिल्लाको विस्तारित बैठकलाई सम्बोधन गर्दै रास्वपा वैकल्पिक शक्तिहरूको मूलधारको पार्टी भएको बताएका हुन्।

आगामी निर्वाचनमा बालेन साह, कुलमान घिसिङ र हर्क साम्पाङजस्ता परिवर्तनका प्रतीक पात्रहरूलाई साथमा लिएर अघि बढ्ने उनको भनाइ छ। उनले पार्टी सभापति रवि लामिछाने कारागारबाट बाहिरिएपछि पुराना राजनीतिक दलहरू आत्तिएको आरोप लगाउँदै फागुन २१ मा तोकिएको निर्वाचन सार्ने कुचेष्टा भइरहेको दाबी गरेका छन्।

उनले भने, ‘जेनजी आन्दोलनको मर्म र जनभावनालाई सम्बोधन गर्न ताजा जनादेशको विकल्प छैन। निर्वाचन तोकिएकै मितिमा हुनुपर्छ।’

कार्यक्रममा रास्वपाका केन्द्रीय प्रशिक्षण विभाग सचिव कमल सुवेदीले आगामी निर्वाचनबाट राष्ट्रिय स्वतन्त्र पार्टी पहिलो शक्ति बन्नेमा कुनै शंका नरहेको बताउँदै मत परिवर्तनका लागि आम नागरिकलाई अपिल गरेका छन्।

उनले भने, ‘रास्वपा हिंसाबाट होइन, मतक्रान्तिबाट मुलुकलाई सुशासन र समृद्धिको दिशामा अघि बढाउन प्रतिबद्ध छ।’