कांग्रेस केन्द्रीय कार्यसमितिको बैठक आज बस्दै, महाधिवेशन कार्यतालिका ल्याउने तयारी

काठमाडौ । नेपाली कांग्रेस केन्द्रीय कार्यसम्पादन समितिको बैठक फेरि आज (सोमबार) का लागि तय गरिएको छ।

आइतबार सभापति शेरबहादुर देउवाको भाडाको निवास (महाराजगन्ज) मा बसेको पदाधिकारी र केही नेतासहितको छलफलमा पार्टीको १५औँ महाधिवेशन आगामी पुस २६ देखि २९ गतेसम्म गर्ने सहमति भएपछि कांग्रेस केन्द्रीय समितिको बैठक आज बस्ने भएको हो। 

आज दिउँसो २ बजे बस्ने बैठकमा कार्यवाहक सभापति पूर्णबहादुर खड्काले महाधिवेशन कार्यतालिका पेस गर्ने तयारी छ।

एक महिनाअघि नै सुरु कांग्रेस केन्द्रीय समिति बैठक महाधिवेशन विवादकै कारण अवरुद्ध छ। 

गत असोज २८ देखि महाधिवेशनको विवादमा अल्झिएको कांग्रेसले सभापति देउवाको निर्देशनबमोजिम निकास निकालेको हो।