महाधिवेशनको कार्यतालिका पेस गर्दै गगन थापा, पुसभित्रमा महाधिवेशन गर्ने कार्यतालिका

काठमाडौँ । नेपाली काँग्रेसको केन्द्रीय समितिमा १५औँ महाधिवेशनबारे आज दुई वटा कार्यतालिका पेस हुँदै छ । महामन्त्री गगन थापाले पुसभित्रमा महाधिवेशन गर्ने गरी कार्यतालिका ल्याउँदै छन् ।

यसअघि कार्यतालिका पेस गर्ने सहमति नभएपछि महामन्त्री शर्माले बैठक नै बहिष्कार गरेका थिए । त्यसयता निरन्तर स्थगित बैठक आज बस्दै छ ।

महामन्त्री थापाले मंसिरमा नसके पुसभित्र नियमित महाधिवेशन गरेर चुनावअघि नै नेतृत्व परिवर्तन गर्नुपर्ने पक्षमा छन् । थापालाई अर्का महामन्त्री विश्वप्रकाश शर्मा र इतर पक्षका नेता डा। शेखर कोइरालाको पनि साथ छ ।

तर, संस्थापन पक्षले भने चुनावअघि कुनै हालतमा महाधिवेशन गर्न नसक्ने अडान लिइरहेको छ । हिजो संस्थापन पक्षका केन्द्रीय सदस्यहरूको भेलाले प्रतिनिधिसभा निर्वाचनपछि वैशाख २५ देखि २८ गतेसम्म पार्टीको १५औँ महाधिवेशन गर्ने प्रस्ताव आजको बैठकमा लैजाने निर्णय गरेको थियो ।

सोमबार धोविघाटमा कार्यवाहक सभापति पूर्णबहादुर खड्कासँगको छलफलमा आ-आफ्नो कुरा राख्ने समझदारी भएअनुसार नै गगन आजको बैठकमा सहभागी हुन तयार भएको बताइएको छ ।

सहमहामन्त्री महेन्द्र यादवले आजको बैठकमा महाधिवेशनबारे सबैले आ-आफ्नो कुरा राख्ने बताए ।

यता विशेष महाधिवेशन पक्षधरले पनि नियमित नभए चुनावअघि नै विशेष महाधिवेशन गर्नुपर्ने दबाब बढाइरहेका छन् । उनीहरूले ५४ प्रतिशत महाधिवेशन प्रतिनिधिको हस्ताक्षरसहित बुझाइसकेका छन् । उनीहरूले केन्द्रीय कमिटीले आलटाल गरेको भन्दै आज विशेष भेला समेत राखेका छन् ।