इजरायलले गाजामा गरेको आक्रमणमा ८० भन्दा बढी प्यालेस्टिनी मारिए

एजेन्सी । इजरायलले बुधबार गाजा पट्टीमा गरेको आक्रमणमा ८० भन्दा बढी प्यालेस्टिनीको मृत्यु भएको स्थानीय अस्पतालले बताएका छन्।

आपत्‌कालीन कर्मचारीहरूका अनुसार गाजा सहरको दराज क्षेत्रको फिरास बजारनजिकै घरबारविहीन परिवारहरूका लागि बनाइएका भवन र पालमा  मात्र इजरायली आक्रमणमा महिला र बालबालिकासहित कम्तीमा २० जना मारिएका छन्। 

इजरायली सेनाले दुई हमास लडाकुलाई निसाना बनाइएको बताएको छ। सेनाले मृत्यु हुनेको संख्या आफ्नो जानकारीसँग मेल नखाने पनि बताएको छ।

यसैबीच इजरायली ट्यांक र सेना सहरको भित्री भागमा अगाडि बढिरहेको छ। जुन इजरायलले हमासको अन्तिम गढ भएको दाबी गरेको छ।

इजरायली सेनाले स्थलगत कारबाही हमासद्वारा बन्धक बनाइएकाहरूलाई मुक्त गर्ने र प्यालेस्टिनी सशस्त्र समूहको ‘निर्णायक पराजय’ सुनिश्चित गर्ने उद्देश्यले गरिएको बताएको छ।