राष्ट्रिय खेलकुदको मिति छिट्टै तय हुन्छ: मन्त्री चौधरी

शुक्रबार सिंहदरवारमा आफ्नो एक वर्षको कार्य विवरण सार्वजनिक गर्दै मन्त्री चौधरीले भक्तपुरमा ५० हजार सिट क्षमता भएको फुटबल रंगशाला निर्माणको कार्य अगाडि बढाइएको जानकारी दिए। 

उनले आफ्नो कार्यकालमा राष्ट्रिय खेलकुद नीति, राष्ट्रिय खेलकुद विकास ऐन, २०७७ लाई समसामयिक संशोधन गर्न बनेको विधेयक संसदमा दर्ता गरिएको, नेपाल खेलकुद विज्ञान प्रतिष्ठानको कार्यविधि २०८२ को मस्यौदा तयारी भएको जानकारी दिए।

मन्त्री चौधरीले जापानमा हुने २०औँ एसियाली खेलकुद प्रतियोगिताका लागि मिसन २०२६ खेलाडी प्रशिक्षणअन्तर्गत १० खेलका ८५ जना खेलाडी र १९ जना प्रशिक्षक गरी जम्मा १०४ जनालाई विशेष प्रशिक्षण सञ्चालन भइरहेको बताए। मूलपानी क्रिकेट रंगशाला, काठमाडौं र गिरिजाप्रसाद कोइराला क्रिकेट रंगशाला, मोरङको डिपिआर सम्पन्न भएको, कीर्तिपुर क्रिकेट मैदानको निर्माण कार्य अन्तिम चरणमा पुगेको उनले बताए।

मन्त्री चौधरीले अहिले २७ मध्ये १६ वटा खेलकुद संघले अन्तर्राष्ट्रिय मान्यता प्राप्त गरेको जानकारी दिँदै उक्त संघहरूलाई अन्तर्राष्ट्रिय प्रतियोगितामा भाग लिन सरकारले नै सहजीकरण गर्ने बताए। ओलम्पिक कमिटीले गैरकानुनीरूपमा आफ्नो काम गरिरहेको बताउँदै उनले छिटै तदर्थ समिति गठन गर्ने समेत बताए।

मन्त्री चौधरीले छिट्टै राष्ट्रिय खेलकुदको मिति तय हुने र तोकिएको मितिमा नै प्रतियोगिता सम्पन्न गर्ने दाबी गरे। उनले अन्तर्राष्ट्रिय भलिबल कवर्डहल निर्माणका लागि काठमाडौँ उपत्यकाभित्र जग्गा प्राप्तिको कार्य छिट्टै हुने उल्लेख गरे। नेपालको दोस्रो पुरानो रंगशाला नारायणी रंगशाला र नारायणी कभर्ड हल निर्माणको कार्य अगाडि बढेको उनको भनाइ छ