गृहमन्त्रीमाथि मानव तस्करीमै छानबिन हुनुपर्छ : सांसद पराजुली

काठमाडौं । रास्वपा सांसद गणेश पराजुलीले भिजिट भिसा प्रकरण भ्रष्टाचारको मात्रै नभई मानवतस्करीको विषय भएकाले गम्भीर भएर छानबिन हुनुपर्ने बताएका छन् ।मंगलबार संसद भवन नयाँ बानेश्वरमा सञ्चारकर्मीसँग कुरा गर्दै पराजुलीले मानवतस्करी भइरहेको उजुरीको अनुसन्धान नगरेर गृह प्रशासनले त्यसलाई प्रश्रय दिएको आरोप लगाए ।

अध्यागमनबाट भिजिट भिसामार्फत नेपालीहरूलाई बेच्ने प्रकरणमा राज्यको निकायहरू नै जोडिएकाले गृहमन्त्री रमेश लेखकको राजीनामा केबल नैतिकताको विषयमात्रै हुन नसक्ने उनको जिकिर छ ।

‘भिजिट भिसामार्फत मानवतस्करीको विषयमा अख्तियारले छानबिन प्रक्रिया अघि बढाएर अध्यागमनका कर्मचारीलाई पक्राउ गर्न खोज्दा गृह मन्त्रालयले दोषी देखिएका कर्मचारी बचाउन रातारात सरुवा गरेको छ’, उनले भने ।

गृहमन्त्री लेखकमाथि प्रशस्त शंका गर्ने ठाउँ भएकाले अनुसन्धानको घेरामा ल्याउनुपर्ने उनको भनाइ छ । पराजुलीले उक्त प्रकरणमा उच्चस्तरीय छानबिन समिति बनाउनुपर्ने पनि दोहोर्‍याए ।