७ सय ८३ किलो गांजा सहितको ट्रक बरामद, २ जना पक्राउ

 काठमाडौ । सुनसरीबाट सशस्त्र प्रहरी बलले ७ सय ८३ किलोग्राम गांजा सहितको ट्रक र २ जना ब्यक्तिलाइ नियन्त्रणमा लिएको छ ।

सशस्त्र प्रहरी बल, नेपाल नं.१ बराह बाहिनी मुख्यालय सुनसरी र सुरक्षा बेश धरानको संयुक्त सुरक्षाफौजले गांजा सहितको ट्रक र त्यसका चालक तथा सहचालकलाई बुधबार नियन्त्रणमा लिएको सशस्त्र प्रहरीका सहप्रवक्ता शैलेन्द्र थापाले बताए ।

धरान उप - महानगरपालिका- १३  निशाने डाँडा स्थित कोशी लोकमार्गमा  भेडेटारबाट धरानतर्फ आउँदै गरेको नम्बर प्लेट नभएको ट्रकलाइ शंका लागि चेकजाँच गर्दा उक्त परिणामको गांजा र  ना ७ ख २८१ लेखिएको   नम्बर प्लेट फेला परेको थियो ।

ट्रकको ड्राइबर सिटमाथी बक्सा बनाएर २२ वटा पोकामा लुकाइ छिपाइ ल्याउंदै गरेको गांजा सहितको  ट्रक , चालक सुनसरी जिल्ला  बराहक्षेत्र नगरपालिका -१ बस्ने ३१ बर्षका  मनोज परियार र सहचालक धनकुटा जिल्ला सिदुवा नगरपालिका-६ बस्ने १८ बर्षका आकाश राईलाई समेत नियन्त्रणमा लिइएको उनको भनाइ छ । 

नियन्त्रणमा लिइएका हरुलाई गांजा र ट्रक सहित  आवश्यक कारवाहिको लागि बुधबार राती नै  जिल्ला प्रहरी कार्यालय ईनरुवा सुनसरीमा बुझाइएको थापाले बताए । यस अघि बुधबार बिहान मात्रै सशस्त्र प्रहरी बल बिपद ब्यबस्थापन बेश  धनकुटाले ४ सय २१ किलो गांजा सहितको कार नियन्त्रणमा लिएको थियो ।