माओवादी केन्द्र र चिनियाँ कम्युनिस्ट पार्टी (सिपिसी) सहयोग आदानप्रदान सम्बन्धमा समझदारी

छोंगछिङ l  नेपाल कम्युनिस्ट पार्टी (माओवादी केन्द्र) र चिनियाँ  कम्युनिस्ट पार्टी (सिपिसी) बीच आपसी सहयोग आदानप्रदान सम्बन्धी समझदारीपत्रमा हस्ताक्षर भएको छ । चीनको छोंगछिङ नगरमा आयोजित विशेष समारोहमा सो समझदारीपत्रमा हस्ताक्षर भएको हो । 

माओवादी केन्द्रको प्रतिनिधिमण्डलले सिपिसीको केन्द्रीय समितिको अन्तर्राष्ट्रिय विभागको निमन्त्रणामा छोंगछिङ नगरपालिका पार्टी स्कूल (छोंगछिङ प्रशासन स्कूल) भ्रमण गरेको थियो ।

समझदारीमा पार्टी निर्माण, राज्य सञ्चालन, कार्यकर्ता प्रशिक्षण तथा अनुभव साटासाटका क्षेत्रमा आपसी सहकार्यलाई थप सुदृढ बनाउने विषय उल्लेख गरिएको छ । यस्तै, पार्टी स्कूल विकास, पाठ्यक्रम निर्माण, शिक्षक विकास, र शिक्षण विधिमा सहकार्य गर्दै कार्यकर्ता शिक्षाको अन्तर्राष्ट्रियकरण तथा व्यावसायिकता प्रवर्द्धन गर्ने विषय सहमतिपत्रमा उल्लेख छ ।

समझदारीमा २१औँ शताब्दीको सन्दर्भमा स्थानीय आवश्यकतासँग मेल खाने माक्र्सवादी सिद्धान्तको विकास तथा त्यसको अभ्यासबारे संयुक्त अनुसन्धान गर्ने, साथै क्षेत्रीय समाजवादी आन्दोलन र राज्य सञ्चालनका विषयमा अध्ययन गर्न पनि सहमति भएको छ ।

सम्झदारीमा उच्चस्तरीय भ्रमण, शिक्षक आदानप्रदान, संयुक्त गोष्ठी, कार्यशालाहरू तथा शैक्षिक संवादमार्फत उच्चस्तरीय संयन्त्र निर्माण गरिने उल्लेख छ । त्यसैगरी दुवै पक्षले भविष्यमा थप सहकार्यका सम्भावनाहरूमा छलफल गर्न समेत सहमति जनाएको छ ।

समझदारी हस्ताक्षरको मितिदेखि लागु हुने यो सम्झौता पाँच वर्षसम्म लागु हुने उल्लेख छ भने समाप्त हुनुभन्दा छ महिनाअघि दुबैतर्फबाट नवीकरणका लागि परामर्श गर्न सकिने व्यवस्था गरिएको छ ।
नेकपा माओवादी केन्द्रका नेताहरु गत चैत २६ गते देखि चीन भ्रमणमा छन् । पार्टी सचीव दिनानाथ शर्माको नेतृत्वको २० सदस्यीय उच्चस्तरीय भ्रमण टोली बुधबार चीनको चोङकिङ सहर आईपुगेको थियो । माओवादी टोली अप्रिल १७ अर्थात् २०८२ वैशाख ४ गते स्वदेश फर्किने छ ।
माओवादी केन्द्रको भ्रमण टोलीमा पार्टी केन्द्रीय सदस्यहरु लेखनाथ न्यौपाने, रामदीप आचार्य, मोरङको ग्रामथान गाउँपालिका अध्यक्ष नमोनारायण माझी लगायत छन् ।