लस एन्जलिसको आगलागी कुन क्षेत्रमा फैलिरहेको छ ?

एजेन्सी । अमेरिकाको लस एन्जलिसमा लागेको आगो अझै पूर्णरुपमा नियन्त्रणमा आउन सकेको छैन । आगो अझै फैलिरहेको क्षेत्रहरूमा पालिसेड्स, ईटन र हर्स्ट समावेश छन्। 

अमेरिकाको लस एन्जलसमा लागेको आगलागीका कारण हालसम्म १६ जनाको मृत्यु भएको छ । इटनमा भएको आगलागीमा ११ जनाको मृत्यु भएको छ भने पालिसेड्समा भएको आगलागीमा पाँच जनाको मृत्यु भएको छ ।

आगलागीबाट सबैभन्दा बढी प्रभावित क्षेत्रमध्ये पलिसेडेस पहिलो स्थानमा छ। यहाँ २३ एकडभन्दा बढी क्षेत्रफलमा फैलिएको आगो ११ प्रतिशत मात्रै नियन्त्रणमा आएको छ ।

हर्स्टको आगो ७९९ एकडमा फैलिएको र यहाँ ७६ प्रतिशत आगो नियन्त्रणमा आएको छ । राष्ट्रिय मौसम सेवाले हावाको बहाव फेरि बलियो हुन सक्ने चेतावनी दिएको छ ।

यता, दमकल विभागले केनेथमा लागेको आगो शतप्रतिशत नियन्त्रणमा आएको जानकारी दिएको छ । 

अमेरिकामा कूल ६ स्थानमा आगलागी भएको छ, जसमध्ये चार ठाउँमा आइतबार पनि आगो निभाउने काम भइरहेको छ । केनेथमा बिहीबारदेखि आगो लागेको थियो।

केनेथको १,०५२ एकडमा आगो फैलिएको थियो। आगलागीबाट सबैभन्दा बढी प्रभावित क्षेत्रमध्ये केनेथ तेस्रो स्थानमा छ । तर, आगो शतप्रतिशत नियन्त्रणमा आउनुको अर्थ पूर्णरुपमा निभिएको होइन । यसको मतलब आगो अझै फैलिनबाट रोकिएको छ।