युक्रेनले गरेको ड्रोन आक्रमणमा रुसी पत्रकारको मृत्यु, सात घाइते

क्रेमलिन । रुसको कब्जामा रहेको उत्तर युक्रेनी सहर दोनेत्स्कमा युक्रेनले गरेको ड्रोन आक्रमणमा परेर एक जना रुसी पत्रकारको मृत्यु भएको छ ।

रुसको सरकारी पत्रिका इज्भेस्तियाले बताएअनुसार यस घटनामा उसको फ्रिलान्स पत्रकारको मृत्यु भएको हो । युक्रेनी सेनाले जानीजानी अलेक्जान्डर मार्तेम्यानोभलाई निशाना बनाएको आरोप रुसले लगाएको छ । यस विषयमा अहिलेसम्म युक्रेनले कुनै प्रतिक्रिया दिएको छैन ।

मार्तेम्यानोभलाई बोकेर गइरहेको सवारी साधनमाथि राजमार्गमा आक्रमण गरिएको इज्भेस्तियाले बताएको छ । यस घटनामा पत्रिकाका अरू पाँच जना कर्मचारी घाइते भएको भनिएको छ ।

उक्त गाडी रुसको कब्जामा रहेको गोर्लिभ्का सहरमा रिपोर्टिङ सकेर आइरहेको रुसको सरकारी समाचार संस्था रियाले भनेको छ । यस घटनामा रियाका दुई जना पत्रकार पनि घाइते भएको बताइएको छ । यस घटनालाई रुसको विदेश मन्त्रालयकी प्रवक्ता मारियो जाखारोभाले जानी जानी गरिएको हत्या भनेकी छिन् ।