सभामुख–जनमत विवाद बढ्यो, सचिवालयको आपत्ति

काठमाडौँ । आफूले कारबाही सिफारिस गरेको सांसदलाई पदमुक्त नगरेपछि जनमत पार्टी सभामुख  देवराज घिमिरेमाथि निरन्तर खनिँदै आएको छ ।  सांसद गोमा लाभ (सापकोटा)को कारबाही सम्बन्धमा सभामुखले गरेको निर्णयउपर जनमतले विज्ञप्ति नै जारी गरेपछि सभामुखको सचिवालय पनि बोलेको छ । 

मंगलबार एक विज्ञप्ति जारी गर्दै सभामुखको सचिवालयले जनमतले जारी गरेको विज्ञप्तिमा प्रयोग भएका शब्द र भाषा अत्यन्तै निन्दनीय, मिथ्या र भ्रमणपूर्ण रहेको उल्लेख गरेको छ । 

 प्रेस सल्लाहकार शेखर अधिकारीले जारी गरेको विज्ञप्तिमा भनिएको छ,‘संसदीय कार्यहरू संविधान, कानुन, संसद् नियमावली र अभ्यास बमोजिम सञ्चालन हुन्छन्, सभामुखले गरेका निर्णय पनि त्यसबाहिर छैनन् भन्ने स्पष्ट पार्न चाहन्छु । जनमत पार्टीलाई ‘माननीय सापकोटा सम्माननीय सभामुखको नातेदार भएको’ भन्ने आरोप पुष्टि गर्न चुनौती दिन चाहन्छु । सभामुखले आफू निर्वाचित भएकै दिन संसद्को निष्पक्ष सञ्चालनका लागि राजनीतिक दलका सबै आबद्धता त्याग गर्नुभएको स्मरण गराउँदै सबै राजनीतिक दल र माननीय सदस्यहरूप्रति समान व्यवहार प्रदर्शन गर्नुभएकोमा कुनै शंका छैन ।’

एउटा राष्ट्रिय पार्टीले सभामुख, संसद् र संसद् सचिवालयप्रति प्रयोग गरेको भाषा र शब्द गैरजिम्मेवार र धम्कीपूर्ण रहेको विज्ञप्तिमा भनिएको छ । विज्ञप्तिमा भनिएको छ, ‘अतः माननीय गोमा लाभको कारबाही सम्बन्धमा संवैधानिक÷कानुनी उपचारमा जाने विकल्प हुँदाहुँदै सभामुखमाथि लगाइएको गैरकानुनी, असभ्य र निराधार आरोपलाई फिर्ता लिन सम्बन्धित दललाई अपिल गर्दछु ।’