सामाजिक विकास कार्यालय डोल्पाका तत्कालीन प्रमुखसहित पाँच जनाविरुद्ध भ्रष्टाचार मुद्दा

काठमाडौं। अख्तियार दुरुपयोग अनुसन्धान आयोगले सामाजिक विकास कार्यालय डोल्पाका तत्कालीन प्रमुख धनञ्जय आचार्यसहित ५ जनाविरुद्ध भ्रष्टाचार मुद्दा दायर गरेको छ । गैरकानूनी लाभ तथा हानी पुर्‍याई भ्रष्टाचार गरेको आरोपमा उनीहरूविरुद्ध मंगलवार विशेष अदालत काठमाडौंमा मुद्दा दायर गरिएको आयोगका प्रवक्ता नरहरि घिमिरेले जानकारी दिए ।

अख्तियारले कार्यालयका सब-इन्जिनियर मोतीप्रसाद बुढा, खेलमैदान निर्माण उपभोक्ता समितिका अध्यक्ष अभिषेक शाही, सचिव अपार गुरुङ र कोषाध्यक्ष विश्वनाथ शाहीविरुद्ध मुद्दा दायर गरिएको जनाएको छ । उनीहरूविरुद्ध नौ लाख ९३ हजार ९४० रुपैयाँ बिगो माग दाबी गरिएको उनले बताए ।

उनीहरूले झुट्टा बिल भरपाई बनाई गैरकानूनी लाभ र हानी पुर्‍याउने बद्‍नियतले भुक्तानी दिने/लिने काम गरी भ्रष्टाचार गरेको पुष्टि हुन आएको अख्तियारले जनाएको छ।

डोल्पाको ठूलीभेरी नगरपालिका-३ दुनैमा खेलकुद मैदान निर्माणको लागि कर्णाली प्रदेश सरकारबाट छुट्याएको रकम अनियमितता गरेको अख्तियारको दाबी छ । 

आर्थिक वर्ष २०७६/०७७ मा सामाजिक विकास कार्यालयबाट विनियोजित रकमबाट ठूलीभेरी-३ स्थित दुनै सदरमुकाममा डीपीआर सम्पन्न भएको कभर्डहल तथा खेलमैदान निर्माण उपभोक्ता समितिमार्फत् निर्माण गरिएको खेलकुद मैदान निर्माणको कार्य लागत अनुमान र सम्झौतामा उल्लिखित कामभन्दा फिल्डमा कम काम गरी बढी काम गरेको भनी गलत विवरण बनाएर अनियमितता गरेको  उनले बताए ।