डीएसपी हुँ भन्दै गाडी चालकलाई धम्क्याउने एक जना पक्राउ

काठमाडौं। प्रहरी नायब उपरीक्षक (डीएसपी) हुँ भन्दै मान्छेलाई धम्काउने एक जना पक्राउ परेका छन् । काठमाडौं प्रहरी परिसरले काठमाडौं महानरपालिका–४ चुनदेवीका ५२ वर्षीय प्रविन श्रेष्ठलाई पक्राउ गरेको हो ।

उनले आइतवार मध्यराति काठमाडौंको लाजिम्पाटमा सवारी चालकलाई धम्काएका थिए । ‘आईडी हेर्छस्..., डीएसपीको आईडी हेर्छस् । तँलाई लगेर थुन्दिउँ’ भन्दै गाडी चलाउने व्यक्तिलाई थर्काएको भिडियो सामाजिक सञ्जालमा भाइरल भएको छ ।

उनले ती व्यक्तिलाई ‘नेपाली नागरिकता छ की छैन,’ भन्दै धम्काएको भिडियोमा देख्न सकिन्छ ।उनलाई नैतिकताविरुद्धको कसूर गरेको अभियोगमा पक्राउ गरिएको हो । उनको प्रहरीसँग कुनै पनि सम्बन्ध नरहेको प्रहरीले जनाएको छ ।