आज सार्वजनिक बिदा छैनः गृह मन्त्रालय

काठमाडौ । गृह मन्त्रालयले मंगलबार सार्वजनिक बिदा नरहेको स्पष्ट पारेको छ ।

मन्त्रिपरिषद्को गत माघ २५ गतेको निर्णयअनुसार बिदा कायम नरहेको मन्त्रालयका सहसचिव तथा प्रवक्ता नारायण प्रसाद भट्टराईले जानकारी दिए । 

जनयुद्ध दिवसको अवसरमा सरकारले बिदा दिने निर्णय गरेपनि सर्वोच्च अदालतले त्यसलाई उल्ट्याइदिएपछि मन्त्रिपरिषद्ले सोहीअनुसार गरेको निर्णय राजपत्रमा प्रकाशित भइसकेको छ । 

जनयुद्ध दिवसमा दिइने बिदा सर्वोच्चले खारेज गरेपनि कतिपय स्थानीय तहले भने आफूखुसी बिदा दिएका छन् ।

तत्कालीन विद्रोही माओवादीले २०५२ फागुन १ देखि जनयुद्ध सुरु गरेको सम्झनामा माओवादी नेतृत्वकै सरकारले बिदाको निर्णय गराएको थियो । तर, सो निर्णयविरुद्ध सर्वोच्चमा रिट परेको थियो ।