पेस्तोल र २० थान गोलीसहित ३ जना पक्राउ

हेटौंडा। १ थान पेस्तोल र २० थान गोलीसहित मकवानपुरबाट ३ जना पक्राउ परेका छन् ।पक्राउ पर्नेमा हेटौंडा उपमहानगरपालिका ९ का ३५ वर्षीय गणेश घले, ३३ वर्षीय निश्चल पौडेल र ३० वर्षीय प्रितम क्षेत्री रहेका छन् ।उनीहरूलाई शुक्रवार हेटौंडा उपमहानगरपालिका १० बाट पक्राउ गरिएको जिल्ला प्रहरी कार्यालय मकवानपुरले जनाएको छ ।

प्रहरीका अनुसार सोही उपमहानगरपालिका ९ स्थित सूर्यप्रसाद पौडेलको घरमा मंसिर १८ गते गोली प्रहार भएको घटनाको अनुसन्धानको क्रममा उनीहरूको संलग्नता खुल्न आएपछि पक्राउ गरिएको हो ।

उनीहरूको साथबाट हतियार सफा गर्ने रड १ थान, लागुऔषध खैरो हेरोइन २ ग्राम ४ सय मिलिग्राम, लागुऔषध तौल गर्ने डिजिटल तराजु २ थान, मोटरसाइकल २ थान, मोबाइल ५ थान, नगद ५० हजार रूपैयाँ र घटनामा प्रयोग भएको कपडा १ थानसमेत बरामद भएको प्रहरीले जनाएको छ ।