गैरआवासीय नेपाली नागरिकता प्राप्तिको सवालमा सरकारले कुनै अप्ठेरो सिर्जना गर्दैनः प्रधानमन्त्री प्रचण्ड

काठमाडौँ । प्रधानमन्त्री प्रचण्डले गैरआवासीय नेपाली नागरिकता प्राप्तिको सवालमा सरकारले कुनै अप्ठेरो सिर्जना नगर्ने बताएका छन् । गैरआवासीय नेपाली संघका कार्यकारी अध्यक्ष डा बद्री केसीको नेतृत्वको एक प्रतिनिधिमण्डलसँगको भेटमा प्रचण्डले यस्तो बताएका हुन् । 

सो क्रममा एनआरएनएले विश्व सम्मेलनका लागि निमन्त्रणा दिँदै गैरआवासीय नागरिकता प्राप्तिमा सहजता गरिदिन आग्रह गरेको थियो । भेटमा संघका अध्यक्ष कुल आचार्यले गैरआवासीय नेपाली नागरिकता प्राप्तिको बाटो खुलिसकेको र नियमावली निर्माणको चरणमा रहेकोले त्यसलाई सहज र एनआरएनमैत्री बनाउन प्रधानमन्त्री तहबाटै पहलकदमी लिइदिन अनुरोध गरेका हुन् । 

जवाफमा प्रधानमन्त्री दाहालले गैरआवासीय नेपाली नागरिकताको सहज कार्यान्वयनमा सरकार सकारात्मक रहेको भन्दै केही अप्ठ्यारो देखिए सुल्झाउँदै अघि बढ्ने बताए ।यस्तै संघका उपाध्यक्ष आर के शर्माले इराक र कुवेतमा पासपोर्ट नवीकरण लगायत नेपालीहरुले व्यहोर्नुपरेको अन्य समस्या सम्बोधनका  लागि कुटनीतिक पहलका लागि प्रधानमन्त्री दाहालको ध्यानाकर्षण गराए । 

प्रधानमन्त्री दाहालले त्यसका लागि पछिल्लो अवस्था मूल्यांकन गरी कूटनीतिक पहल अघि बढाउने प्रतिबद्धता व्यक्त गरे । फरक प्रसंगमा प्रधानमन्त्री दाहालले योगदानमा आधारित सामाजिक सुरक्षा कोषको कार्यान्वयनमा गैरआवासीय नेपाली संघले खेलेको भूमिकाको प्रशंसा गर्दै आगामी दिनमा उक्त योजनालाई अझ बृहत रुपमा अघि बढाउन आग्रह गरे । 

सो क्रममा संघका कार्यकारी अध्यक्ष डा केसीले आगामी अक्टोबर ११ औँ महाधिवेशन तथा विश्व सम्मेलन, सोही अवसरमा हुने विश्व ज्ञान सम्मेलन र युवा तथा महिला सम्मेलनको विषयमा प्रधानमन्त्रीलाई जानकारी गराएका थिए । 

प्रधानमन्त्रीले विश्व सम्मेलनको सफल आयोजनाका लागि शुभकामना दिँदै आफू पनि उपस्थित हुने प्रतिबद्धता व्यक्त गरेको संघले जनाएको छ ।