लुम्बिनीमा चार दलले समर्थन फिर्ता लिने

काठमाडौं । संघमा नयाँ राजनीतिक समीकरण बनेसंगै लुम्बिनी प्रदेशमा पनि प्रदेशको सत्ता समीकरण बदलिने देखिएको छ । सत्ता साझेदार चार दल नेकपा माओवादी केन्द्र,नागरिक उन्मुक्ति पार्टी, जसपा र लोसपाले सरकारलाई दिएको समर्थन फिर्ता लिने तयारी गरेका छन् । चार दलले अनौपचारिक रूपमा छलफल समेत गरिरहेका छन् ।

सरकारलाई दिएको समर्थन फिर्ता र नयाँ सत्ता समीकरणका लागि दलहरु केन्द्रको पर्खाइमा छन् । नेकपा माओवादी केन्द्र लुम्बिनी प्रदेशका अध्यक्ष सुदर्शन बरालले नयाँ राजनीतिक समीकरणसहितको सरकार निर्माणका लागि केन्द्रको निर्णय पर्खिएको जानकारी दिए ।

पार्टीको केन्द्रीय निर्णय बमोजिम समर्थन फिर्ता लिने र नयाँ सत्ता समीकरण कसरी अघि बढाउने भन्ने विषय पार्टीभित्र प्रवेश गरेको उनको भनाई छ । नेपाली कांग्रेसले पनि एमाले नेतृत्वको प्रदेश सरकारलाई दिएको समर्थन फिर्ताका लागि चार दलहरूको छलफल भइरहेको जनाएको छ ।

कांग्रेसका लुम्बिनी प्रदेश संसदीय दलका नेता डिल्लीबहादुर चौधरीले चार दलले समर्थन फिर्ता लिने र नयाँ सरकारको गठनको विषय प्रवेश पाउने जानकारी दिए।