राप्रपा र रास्वपाले अब राष्ट्रपतिमा कित्ता क्लियर गर्न नपाउने

काठमाडौं । फागुन २५ गते हुने राष्ट्रपति निर्वाचनका लागि सोमबार रातिदेखि आचारसंहिता लागू भएको छ । सोमबार रातिदेखि आचारसंहिता लागू भएपछि अब कसैले उम्मेदवारबारे कित्ता क्लियर गर्न नपाउने निर्वाचन आयोगले जनाएको छ ।

राष्ट्रपतिका उम्मेदवार रामचन्द्र पौडेल र सुवासचन्द्र नेम्वाङ कसलाई भोट हाल्ने भनेर उनीहरुले अब औपचारिक निर्णय सार्वजनिक गर्न नपाउने सूचना अधिकारी तथा आयोगका सहायक प्रवक्ता सुर्यप्रसाद अर्यालले जानकारी दिए ।

उनले भने, ‘पार्टीगतरुपमा आन्तरिक बैठक हुनु, छलफल हुनु छुट्टै कुरा हो । तर सार्वजनिक रूपमा कसैको पक्षधरता देखाएर सूचना प्रवाह गर्न पाइदैन् ।’आचारसंहिता अनुसार उम्मेदवारको पक्ष वा विपक्षमा कुनै पनि प्रकारको प्रचारप्रसार गर्न, मत माग्न, एसएमएस, फेसबुक, भाइबरजस्ता विद्युतीय माध्यमबाट मत माग्न पाइँदैन । आचारसंहिता विपरीत वक्तव्य दिन, प्रेस विज्ञप्ति निकाल्न, प्रकाशन तथा प्रसारण गर्न, सञ्चारमाध्यमबाट जीतरहारको पूर्वानुमानका सामग्री प्रसारजस्ता कार्य गर्न नहुने भएको हुँदा यस्ता आचरण पालना गर्नरगराउन सम्बन्धित सबैलाई आयोगले आग्रह गरेको छ ।

राष्ट्रिय प्रजातन्त्र पार्टी, राष्ट्रिय स्वतन्त्र पार्टी लगायतका केही साना पार्टीले अहिलेसम्म कसलाई मत दिने भनेर कित्ता क्लियर गरेको अवस्था छैन् ।