कांग्रेसले प्रस्ताव गरेको व्यक्ति राष्ट्रपति बन्नेछ : विश्वप्रकाश शर्मा

काठमाडौं । नेपाली कांग्रेसका महामन्त्री विश्वप्रकाश शर्माले कांग्रेसले प्रस्ताव गरेको व्यक्ति राष्ट्रपति बन्ने बताएका छन् ।

बुधबार संघीय संसद भवन नयाँबानेश्वरमा सभामुख मनोनयन दर्तापछि सञ्चारकर्मीले राष्ट्रपतिको विषयमा सोधेको प्रश्नमा महामन्त्री शर्माले त्यसको जवाफ दिँदै कांग्रेसले प्रस्ताव गरेको व्यक्ति राष्ट्रपति बन्ने बताए ।

उनले भने, ‘शीतल निवासमा नेपाली कांग्रेसले प्रस्तावित गरेको व्यक्तित्व राष्ट्रपतिको रूपमा तपाईंहरूले देख्नुहुनेछ ।’त्यसपछि सञ्चारकर्मीले महामन्त्री शर्मालाई थप प्रश्न गरे । ‘प्रधानमन्त्री प्रचण्डले यस विषयमा सकारात्मक जवाफ दिनुभएको हो ?’ उनले जवाफ फर्काए, ‘अहिलेलाई यतिमात्रै कुरा गरौं । धेरै टिप्पणी गर्नु उचित हुँदैन । किनभने अहिले हामी सभामुखको चरणमा छौं । सभामुखको चरण सकिएपछि राष्ट्रपतिको चरण जब आउँछ, त्यसपछि थाहा हुन्छ । यसका लागि समय लाग्छ ।’