सुदूरपश्चिममा दोस्रोपटक पनि सभामुखमा बहुमत जुटेन

कैलाली । सुदूरपश्चिम प्रदेश सभाको सभामुखका लागि दोस्रोपटक आज भएको निर्वाचनमा पनि बहुमत जुट्न सकेको छैन । नागरिक उन्मुक्ति पार्टी तटस्थ बस्दा कुनै पनि उम्मेदवारले बहुमत नपाएका हुन् ।

सत्तारुढ गठबन्धनमै रहेको उन्मुक्ति पार्टीले आज मत विभाजनमा सहभागिता जनाएन । सरकार गठनका बेला भने नेकपा एमाले नेतृत्वको गठबन्धनलाई नै समर्थन गरेको उन्मुक्ति पार्टीले सभामुख निर्वाचनमा भने मत हालेन । ऊ तटस्त बसिदिँदा सत्तारुढ गठबन्धनले पनि सभामुखमा बहुमत जुटाउन सकेन भने प्रतिपक्षी कांग्रेसले पनि जुटाउन सकेन ।

आजको निर्वाचनमा दुवै उम्मेदवारले बराबर मत प्राप्त गरेका छन् । कांग्रेस सांसद मानबहादुर रावलले सत्तारुढ गठबन्धनका तर्फबाट उठेका माओवादी केन्द्रका उम्मेदवार भीमबहादुर भण्डारीको पक्षमा २२ मत र विपक्षमा रहेका कांग्रेस उम्मेदवार मानबहादुर रावलले पनि २२ मत नै पाए । सभामुख चयनका लागि २७ मतको आवश्यकता पर्दछ ।

५३ सदस्य रहेको प्रदेशसभामा आजको मत विभाजनमा ४४ जना सदस्य मात्र सहभागी भए । ५३ सदस्य रहेको प्रदेशसभामा आजको मत विभाजनमा ४४ जना सदस्य मात्र सहभागी भए । ७ जना सांसद रहेको नागरिक उन्मुक्ति पार्टीले आफ्ना माग सम्बोधन नभएको भन्दै मत विभाजनका क्रममा तटस्थ बसेको हो ।