सुदूरपश्चिमका सांसदसँग प्रधानमन्त्री शाहको छलफल

काठमाडौँ। प्रधानमन्त्री बालेन्द्र शाह (बालेन)ले विभिन्न प्रदेशका जनप्रतिनिधिसँग गरिँदै आएको छलफल श्रृंखलालाई निरन्तरता दिँदै सुदूरपश्चिम प्रदेशबाट निर्वाचित प्रतिनिधि सभा सदस्यहरूसँग परामर्श गरेका छन्।

प्रधानमन्त्रीले यसअघि कोशी र कर्णाली प्रदेशबाट प्रतिनिधित्व गर्ने सांसदहरूसँग संवाद गरिसकेका थिए। सोही क्रमलाई अघि बढाउँदै मंगलबार सुदूरपश्चिम प्रदेशका सांसदहरूसँग छलफल गरिएको हो।

प्रधानमन्त्रीको निजी सचिवालयका अनुसार उक्त बैठक सिंहदरबारस्थित प्रधानमन्त्री तथा मन्त्रिपरिषद्को कार्यालयमा आयोजना गरिएको हो, जहाँ सुदूरपश्चिम क्षेत्रका जनप्रतिनिधिहरू सहभागी छन्।

सरकार प्रमुखले प्रदेशगत रूपमा सांसदहरूसँग प्रत्यक्ष संवाद गर्दै क्षेत्रगत समस्या, प्राथमिकता र विकाससम्बन्धी विषयमा जानकारी लिने उद्देश्यसहित यस्तो छलफल अघि बढाइरहेका छन्।