‘अहिले नै प्रधानमन्त्री को बन्ने टुंगो लागिसकेको छैन्’ : प्रचण्ड

सफल खबर संवाददाता

सोमबार, ०४ पुस २०७९, ११ : ११
‘अहिले नै प्रधानमन्त्री को बन्ने टुंगो लागिसकेको छैन्’ : प्रचण्ड

चितवन । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले अबको प्रधानमन्त्री को बन्ने भन्ने टुंगिनसकेको बताएका छन् । सोमबार चितवनमामा पत्रकारसँग अध्यक्ष प्रचण्डले भने, ‘हामी गठबन्धनमा छलफल गर्छौ र टुंग्याउछौ । अहिले नै को प्रधानमन्त्री बन्ने भन्ने टुंगो लागेको छैन।’

त्यसक्रममा उनले प्रधानमन्त्रीका लागि सबै विषयमा दाउमा राख्ने पक्षमा नरहेको प्रष्ट पारेका छन् । ‘मैले प्रधानमन्त्रीका लागि सबै चिज दाउमा लगाउने काम मैले कहिल्यै पनि गरेको छैन’,

राष्ट्रपतिले सरकार गठनका लागि सात दिनको समय दिइसकेकाले सोही समयावधिभित्र गठबन्धनकै सरकार बन्ने तर कसको नेतृत्वमा सरकार गठन गर्ने भन्नेबारे छलफल चलिराखेको सुनाए । अध्यक्ष प्रचण्डले थपे, ‘मैले प्रधानमन्त्रीका लागि आकांक्षा राख्नु स्वाभाविक हो तर बाहिर भनेजस्तो दाबी भनेर औपचारिक रूपमा गठबन्धनको बैठकमा गरेको छैन ।’

माओवादीले एमालेसँग सरकार बनाउने भन्ने चर्चा सत्य नभएको पनि बताए। तर एमालेसँग माओवादीको कुराकानी हुनु स्वाभाविक भएको तर्क गरे । ‘यो स्वाभाविक हो, कांग्रेस–एमालेको पनि कुरा भइरहेको छ । कुरा हुनेवित्तिकै टुंगोमा पुगेको भन्ने होइन’अध्यक्ष प्रचण्डको भनाइ छ ।

प्रचण्डले राष्ट्रपति, प्रधानमन्त्री, सभामुख लगायतका शक्ति बाँडफाँड गरेर प्याकेजमै सहमति खोज्ने प्रयत्नमा दलहरू रहेको बताए । उनले राष्ट्रपति गैर दलीय व्यक्ति हुन नसक्ने बताए । ‘गठबन्धनमा गैर दलीय व्यक्ति प्रधानमन्त्री हुने भनेर छलफल भएको छैन । सम्भावना पनि छैन।’

प्रतिक्रिया दिनुहोस