राजीनामा दिएसँगै भरतपुरबाट रेनु दाहालको बिदाइ

भरतपुर । अर्को कार्यकालका लागि सत्ता गठबन्धनको साझा उम्मेदवारको रुपमा मेयर पदमा उठ्ने भएपछि राजीनामा दिएकी भरतपुर महानगरपालिकाकी मेयर रेनु दाहालको बिदाइ गरिएको छ । 

कार्यवाहक प्रमुख  पार्वती शाह ठकुरीको उपस्थितिमा शुक्रबार महानगरपालिकाले दाहाललाई बिदाइ गरेको हो ।  सोही अवसरमा अर्को कार्यकाल चुनाव लड्न लागेका वडाअध्यक्ष तथा वडा सदस्यहरूलाई पनि महानगरपालिकाले बिदाइ गरेको थियो । 

कार्यवाहक प्रमुख पार्वती शाह ठकुरी र प्रमुख प्रशासकीय अधिकृत रामबन्दु सुवेदीले दाहालसहित वडाअध्यक्षहरू प्रकाश दवाडी ,चित्रसेन अधिकारी , विष्णुराज महतो  ,राजेन्द्रमणि काफ्ले, विजय भूजेल लगायतलाई खादा लगाएर बिदाइ गरेका थिए । 

सो क्रममा कार्यबाहक प्रमुख ठकुरीले प्रमुख  तथा अन्य वडाध्यक्षहरूलाई आसन्न निर्वाचनमा बिजयी भई पुनः स्वागत गर्न आफूआतुर रहेको भन्दै शूभकामना दिइन् । 

सो क्रममा दाहालले आफूले आसन्न स्थानीय निर्वाचनमा  उमेद्वारी दिने योजनाका साथ राजीनामा गरी निर्वाचनमा होमिएको बताउँदै कार्य सम्पादनको ५ वर्षको अनुभूतिहितको मन्तव्य राखेकी थिइन् । 
दाहालले भरतपुर महानगरपालिका देशकै पालिकाहरूमा अब्बल बन्न सकेको भन्दै खुसी व्यक्त गरिन् ।यो अवधिमा भरतपुर महानगरपालिकाले महानगरको समग्र बिकासमा ठूलो छलाड्ग मारेको उनको भनाइ थियो । 

कार्यक्रममा भरतपुर महानगरका प्रवक्ता तथा वडा नम्बर १० का अध्यक्ष अरूण पीडित भण्डारीले बिदाई हुने सबै जनप्रतिनिधिहरूलाई उज्जल भविष्यको कामना गरे ।