स्वास्थ्यमा रिक्त बाह्रौँ तहको पदमा बढुवा प्रक्रिया अघि बढ्यो

काठमाडौं  ।   स्वास्थ्य तथा जनसंख्या मन्त्रालयले रिक्त रहेको स्वास्थ्य सेवा समूहको अधिकृत १२ औं तह (प्रमुख विशेषज्ञ पद) मा बढुवा प्रक्रिया अघि बढाएको छ। आइतबार ( आज) स्वास्थ्य तथा जनसंख्या मन्त्रालय बढुवा समितिको सचिवालयले एक सूचना जारी गरेको हो ।

मन्त्रालयमा रिक्त रहेको १२ औं तहमा बढुवा गर्न बढुवा समितिको चैत २ गते निर्णयअनुसार स्वास्थ्य सेवा ऐन २०५३ को दफा २५ २ बमोजिम रिक्त संख्यामा पदपूर्ति गर्नुपर्ने भएकोले २०७८ असारसम्म नेपाल स्वास्थ्य सेवा ऐनको दफा २६ (१) अनुसार सेवा अबधि पुरा गरेका एघारौं तहका अधिकृत कर्मचारीले १२ औ तहमा प्रतिष्पर्धा गर्न पाउनेछन्।

स्वास्थ्य मन्त्रालयमा स्वास्थ्य सेवा समूहअन्तर्गत १२ औँ तहको पद ४ वटा रहेको छ । त्यसमध्ये अहिले एउटा पद खाली भएको छ । गत २ मंसिरमा प्रमुख विशेषज्ञ पदमा बढुवा भएका डा भीमसिंह तिंकरीले गत २ माघमा अवकाश पाएपछि एउटा पद खाली भएको हो । अहिले सोही पदमा बढुवा गर्नका लागि निवेदन मागिएको हो ।स्वास्थ्यमा अहिले डा दीपेन्द्ररमण सिंह, डा श्यामसुन्दर यादव र डा गुणराज लोहनी प्रमुख विशेषज्ञ पदमा कार्यरत छन् ।

बाह्रौं तहको एउटा पदमा बढुवाका लागि स्वास्थ्य मन्त्रालयको अन्तर्राष्ट्रिय समन्वय महाशाखा प्रमुख डा. संगिता कौशल मिश्रा, डा. श्रीकृष्ण श्रेष्ठ, डा. विकास देवकोटा, डा. कृष्ण पौडेल लगायतको मुख्य दाबेदारी रहेका छन्।