महाधिवेशन प्रतिनिधिको जोडघटाउमा काँग्रेस नेताहरु

काठमाडौं । सत्ताधारी दल नेपाली कांग्रेसले आन्तरिक विवादका कारण अन्योल भएको महाधिवेशन प्रक्रिया अगाडि बढेसँगै केन्द्रीय नेतृत्वले आफ्नो सम्पूर्ण ध्यान फेरि महाधिवेशन प्रतिनिधिको जोडघटाउमा केन्द्रित गर्न थालेका छन् ।

केन्द्रीय नेतृत्व चयन गर्ने महाधिवेशन प्रतिनिधि प्रतिनिधिसभा, क्षेत्रीय अधिवेशनबाट चुनिएर आउने भएकाले कांग्रेस महाधिवेशनमा निर्वाचन क्षेत्रको अधिवेशनले विशेष महत्व राख्ने गरेको छ । जसका कारण क्षेत्रीय अधिवेशनमा केन्द्रीय नेताहरुले आफ्नो सम्पूर्ण शक्ति लगाउने गर्छन् । मंसिर ६ गते र १० गते बाँकी रहेको अधिकांश निर्वाचन क्षेत्रमा अधिवेशन हुने भएकाले केन्द्रीय नेतृत्व दाबी गर्ने नेताहरुले जोडघटाउको हिसाब राख्न थालिसकेका छन् ।

हालसम्म १३ जिल्लाको १४ निर्वाचन क्षेत्रमा अधिवेशन सम्पन्न भई ३ सय ५५ जना महाधिवेशन प्रतिनिधि चयन भइसकेका छन् । १४ निर्वाचन क्षेत्रबाट आउने महाधिवेशन प्रतिनिधिमध्ये पुनः नेतृत्व हत्याउने रणनीतिमा लागेका सभापति शेरबहादुर देउवा पक्षका २ सय २१ जना नेतृत्वका दाबी गरिरहेका वरिष्ठ नेता रामचन्द्र पौडेल पक्षका १ सय १३ जना र १३औं महाधिवेशनबाट कांग्रेसभित्र तेस्रो गुट स्थापना गरेका नेता कृष्णप्रसाद सिटौला पक्षका २१ जना रहेको दाबी गरिएको छ । नेपाल समाचारपत्रमा खबर छ ।