बिहीबार मन्त्रिपरिषद् विस्तार हुन्छ : प्रचण्ड

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले बिहीबार (भोलि) मन्त्रिपरिषद् विस्तार हुने बताएका छन् ।

बुधबार बसेको स्थायी कमिटी बैठकमा अध्यक्ष प्रचण्डले बिहीबार सत्ता गठबन्धनमा आबद्ध दलका शीर्ष नेताको बैठक बस्ने र सरकार विस्तार हुने ‘ब्रिफिङ’ गरेको एक स्थायी कमिटी सदस्यले जानकारी दिए । उनका अनुसार माओवादीका तर्फबाट अब तीन मन्त्री र एक राज्यमन्त्री थपिनेछन् । माओवादीका तर्फबाट अहिले जनार्दन शर्मा र पम्फा भुसाल सरकारमा सहभागी छन् ।

मन्त्रीका विषयमा भने आजको बैठकमा छलफल नभएको स्थायी कमिटी सदस्य गणेश साहले बताए । आजको बैठकमा पार्टीको सम्मेलनलगायत विषयमा छलफल भएको उनले जानकारी दिए ।

अर्का एक स्थायी कमिटी सदस्यका अनुसार ‘मन्त्री छान्नका लागि प्रचण्ड तनावमा’ छन् । “आफूलाई मन्त्री बनाउनुप¥यो भनेर नेताहरूले दबाब दिएका छन् । अध्यक्ष तनावमा हुनुहुन्छ । त्यसकारण मन्त्रीका बारेमा छलफल नभएको होला,” ती नेताले भने ।उनका अनुसार सरकारले संसद् अधिवेशन अन्त्यको तयारी गरेको छ । भोलि संसद् बैठक बसेपछि अधिवेशन अन्त्यको तयारी गरिएको हो ।