संसद् सांसद्को प्रश्न र सरकारको निगरानीसँग डराउनुपर्छ : गगन थापा

काठमाडौं । नेपाली कांग्रेसका सांसद् गगन थापाले संसद् सांसद्को प्रश्न र सरकारको निगरानीसँग डराउनुपर्ने बताएका छन । प्रतिनिधिसभाको मंगलबारको बैठकमा सांसद् थापाले नयाँ सरकारलाई पहिलाको सरकारलाई जस्तो संसद्लाई हेप्ने, अदालतलाई हप्काउने, विधि र विज्ञान नमान्ने, आसेपासे पोस्ने, स्थानीय र प्रदेश सरकारलाई पङ्गु बनाउने जस्ता अपराध गर्ने छुट नभएको बताए ।

‘न यो संसद्लाई बेवास्ता गर्न दिइनेछ, न त कामविहीन बनाउन, न मनोमानी ढंगले स्थगित गर्न दिइने छ, न त छल्न,’ उनले भने,‘यो संसद् सरकारसँग डराउने होइन, सरकार यो संसद्सँग डराउनुपर्छ, सांसद्को प्रश्न र सरकारको निगरानीसँग डराउनुपर्छ ।’

परीक्षा प्रधानमन्त्रीको मात्र नभएको सभामुखको पनि भएको बताउँदै थापाले संविधानको धाराले प्रतिनिधिसभा र सांसदको अधिकारले सरकार पुनःस्थापित भएको स्पष्ट पारे। उनले  सभामुख र सांसद्को कर्मले गुमेको प्रतिनिधिसभा र संविधानकप्रतिको विश्वास फर्काउनुपर्नेमा उनको जोड थियो ।