गायक प्रकाश सपुतले ल्याए नयाँ गीत ‘प्रार्थना’ (भिडिओसहित)

काठमाडौं । निषेधाज्ञाको समय कलाकारका लागि संगीत सिर्जना गर्ने अवसर पनि बनेको छ । सुरक्षा सावधानी अपनाएरै गायक प्रकाश सपुतले मेलिना राईसँग मिलेर नयाँ गीत ‘प्रार्थना’ इन्टरनेट रिलिज गरेका छन् ।

अशोक शेरचनको शब्द रहेको गीत प्रकाशकै संगीत र योगेश काजीको संगीत संयोजनमा तयार भएको हो ।गीत निषेधाज्ञाकै समयमा उच्च सुरक्षा सावधानी अपनाएर रेकर्डिङ तथा छायांकन गरिएको सपुतले जनाए । गीतको भिडियो समेत तयार भएको छ । प्रवेश पौडेलको निर्देशनमा तयार भिडियोमा गायक प्रकाश सपूत, गायिका मेलिना राई लगायतको अभिनय छ ।

कोरोना महामारीबाट बचाउन गरिएको प्रार्थनामा गीत आधारित छ । भाइरस संक्रमणको कारण कसैले ज्यान गुमाउनु नपरोस् भन्ने शब्दसहित गीत बुनिएको छ । मृत्यु र दुःखका खबर सुन्नु नपरोस् भन्ने शुभेच्छसहित गीत रिलिज गरिएको प्रकाशले बताए । प्रकाशले यसअघि पनि मानवीय भावना पोतिएका गीत बनाउने गरेका थिए ।गायक सपुतले केही साता अगाडि मेरो पनि होइन र यो देश गीत लन्च गरेका थिए ।