अमेरिकी सेना फर्किएमा अफगानिस्तानमा फेरि युद्ध निम्तनसक्छ : पाकिस्तान

पाकिस्तान ।  अमेरिकाले सेना फिर्ता गरेपछि अफगानिस्तानमा फेरि गृहयुद्ध  निम्तनसक्ने चिन्ता पाकिस्तानले व्यक्त गरेको छ । पाकिस्तानका विदेश मन्त्री शाह महसूद कुरैशीले अफगानिस्तानका सभामुख मीर रहमान रहमानीसँगको वार्ताका दौरान यस्तो चिन्ता व्यक्त गरेका हुन् । 

युद्धरत अफगान समूहहरुबीच सम्झौता हुनअघिदेखि नै सम्बन्ध बिग्रन थालिसकेको उनले बताएका छन् । दुई दिनपछि फेरि एकपटक अफगानिस्तानमा सरकार र तालिवानबीच वार्ता हुँदैछ । यद्यपी, यस वार्ताबाट कमैमात्र आशा रहेको कुरैशीले बताएका छन् । अमेरिकी फौज फिर्ता गएपछि अफगानिस्तानमा गृहयुद्ध निम्तनसक्ने आशंका पाकिस्तानलाई लागेको उनले बताएका छन् । कुरैशीका अनुसार अघिल्लो वर्षको सेप्टेम्बरदेखि सुरु भएको शान्ति प्रक्रियामा अहिलेसम्म खासै धेरै उपलब्धि देखिएको छैन । जे–जति  प्राप्त भएको छ, त्यसका लागि पनि सामान्य मुद्दाहरुमै लामो समय बहस गर्नुपरेको छ । 

‘अफगान समूहहरुसँग देशको  भविष्यका लागि व्यापक मजबुत सम्झौता गर्न सकिने एक सुनौलो मौका छ । त्यहाँको शान्ति र समृद्धीका लागि यो उपलब्धिमुलक हुनसक्छ । अफगान समूहहरुले यसको पुरै फाइदा उठाउनुपर्छ र अवसरलाई खेर जान दिन हुँदैन,’ पाकिस्तानको विदेश मन्त्रालयका तर्फबाट जारी गरिएको आधिकारीक विज्ञप्तिमा भनिएको छ । 

अमेरिकाको राष्ट्रपतिका रुपमा जो बाइडेनले सपथ लिएपछि तालिवान र अमेरिकाबीच विगतमा भएको सम्झौतालाई समिक्षा गरिने बताएका थिए । पूर्व सम्झौताअनुसार मेईमा अफगानिस्तानबाट अमेरिकी फौजलाई फर्काउन असमर्थ रहेको पनि उनले बताएका थिए, यद्यपी सेप्टेम्बर ११ को वर्षगाँठभन्दा पहिले नै आफ्नो फौजलाई अफगानिस्तानबाट निकाल्ने उनले बताएका छन् । 

अन्तर्राष्ट्रिय समुदाय र पाकिस्तानले अफगानिस्तानको सरकार र विद्रोहीलाई वार्ताको मञ्चमा आउन र सबै विवाद अन्त्य गर्न अपिल गरेपनि यसको कुनै असर नदेखिएको पनि पाकिस्तानले जनाएको छ । पाकिस्तानले अफगानिस्तानमा अन्तरिम सरकार बन्नुपर्ने धारणा राखेको थियो । यद्यपी, अफगानिस्तानका राष्ट्रपतिको विरोधका कारण यो प्रक्रिया अघि बढ्न सकेन । यता, तालिवानका नेताहरुले पनि शान्ति प्रक्रियाबाट कुनै उपलब्धि हासिल नभएको तर्क गर्न थालेका छन् । 

पाकिस्तानी पत्रिका द डनका अनुसार पछिल्लो समय तालिवानले अफगानस्तिानका केही ठूला र मजबुत इलाका आफ्नो कब्जामा लिएको छ । वर्तमान समय अफगानिस्तानको राष्ट्रिय सेनाले देशको ५० प्रतिशत हिस्सामा मात्रै नियन्त्रण कायम राखेको छ । ३० प्रतिशत भूमी तालिवानको कब्जामा छ भने बाँकी २० प्रतिशत भूमीमा झडप जारी छ । 
अफगानिस्तानमा अहिले झन्डै २५ सय अमेरिकी फौज र सात हजार नेटो सैनिक परिचालित छन् ।