सगरमाथामा दुई दिनदेखि भारी हिमपात, आरोहण प्रभावित

ओखलढुंगा । सगरमाथामा बुधबारदेखि बाक्लो हिमपात सुरु भएको छ । बाक्लो हिमपातका कारण आरोहण प्रभावित हुनुका साथै आरोहण गरेर फर्किएका आरोहीहरु दोश्रो शिविरमै रोकिएका छन् । बिहीबार पनि बिहानैदेखि हिमपात भइरहेको छ ।

आरोहण गरिसकेका आरोहण कम्पनीका कामदारहरले दोस्रो शिविरदेखि सामान लिएर फर्किन सकेका छैनन् । केही आरोहीहरु फर्किने क्रममा घाइते भई उद्धारका लागि हेलिकप्टर मगाए पनि खराब मौसमका कारण लुक्लादेखि आधारशिविर नै हेलिकप्टर जान नसकेको आधारशिविरमा रहेका सम्पर्क अधिकृत खिमलाल गौतमले बताए ।

दोस्रो शिविरको सामान उठाउन आधारशिविरबाटै उच्च हिमाली कामदारहरु उकालो जान नसकेको उनले फेसबुकमा जानकारी दिएका छन् । उनले लेखेका छन्, ‘केही शेर्पाहरू माथिका टेन्ट उठाउन राति उकालो लागे तापनि पहिलो शिविरमाथि भारी हिमपातका कारण त्यही रोकिएको खबर आएको छ । हामीले सबैलाई सचेत पूर्वक मौसम नसुध्रिएसम्मका लागि यथास्थितिमा रहन भनिरहेका छौँ ।’ कान्तिपुर दैनिकमा खबर छ ।