स्वास्थ्य सामग्रीको भन्सार जाँच पास छरितो बनाउन अर्थमन्त्री पौडेलको निर्देशन

काठमाडौं । अर्थमन्त्री विष्णुप्रसाद पौडेलले कोभिड–१९ को रोकथाम, उपचार र नियन्त्रणसँग सम्बन्धित स्वास्थ्य सामग्री, उपकरण र औषधीको भन्सार जाँच पासलाई सबैभन्दा प्राथमिकता दिएर छिटो र छरितो बनाउन निर्देशन दिएका छन् ।

सोमबार अर्थमन्त्रालयमा भर्चुअल माध्यमबाट कार्यक्रमको आयोजना गर्दै अर्थमन्त्री पौडेलले भन्सार विभागका महानिर्देशक, उपमहानिर्देशक, विभिन्न भन्सार कार्यालयका प्रमुखहरु, प्रदेश, स्थानीय तह, गैरसरकारी संस्था लगायतलाई निर्देशन दिएका हुन् ।

अर्थमन्त्री पौडेलले निजी क्षेत्रले आयात गर्ने लिक्विड अक्सिजन, अक्सिजन सिलिन्डर, अक्सिजन प्लान्ट र त्यसका पार्टपुर्जा लगायतका सामग्रीहरुको आयातमा बिना झन्झट भन्सार जाँचपास गरी आपूर्तिलाई थप सहज बनाउन सम्बन्धित निकायहरूलाई निर्देशन दिएका हुन् । 

सो अवसरमा उनले एकातिर कोभिड–१९ बाट जोगिनुपर्ने र अर्कातिर प्रभावकारी रुपमा कार्य सम्पादन गर्नुपर्ने अवस्था रहेको उल्लेख गर्दै स्वास्थ्य मापदण्ड पालना गरी काम गर्न समेत कर्मचारीहरुलाई आग्रह गरेका छन् । कोभिड–१९ को उपचारका लागि आयात भएका वस्तुको परिणाम र मूल्यसहित दैनिक रुपमा जानकारी गराउन पनि मन्त्री पौडेलले निर्देशन दिएका छन् ।