प्रधानमन्त्री ओलीलाई एमाले सांसदले भने– पार्टी विभाजन भए अबको चुनावमा शून्य सिट आउँछ

काठमाडौैं । प्रधानमन्त्री केपी शर्मा ओलीलाई नेकपा एमालेका सांसदहरुले पार्टी विभाजन भए आगामी चुनावमा देशभर शून्य सिट आउने चेतावनी दिएका छन् । 

अध्यक्ष ओलीले कर्णाली प्रदेशअन्तर्गतका दैलेख, सुर्खेतका एमालको सांसदहरूलाई भेट्न बोलाउँदा उनीहरुले यस्तो चेतावनी दिएका हुन् । उनीहरुले एमालेका अध्यक्षसमेत रहेका माधवकुमार नेपाललाई ‘एक्ल्याउने’ रणनीति नलिनसमेत सुझाव दिएका छन् । वरिष्ठ नेता झलनाथ खनाल र नेपाल समूह समानान्तर गतिविधिमा लागेका बेला पार्टी अध्यक्ष ओलीले सांसद र केन्द्रीय सदस्यलाई छुट्टाछुट्टै भेट्न थालेका छन् ।

भेटका क्रममा दलका नेतासमेत रहेका ओलीले निर्वाचन क्षेत्रमा भएका विकास–निर्माण र आयोजनाको अवस्थासमेत बुझेका थिए । प्रधानमन्त्रीलाई भेट्न दैलेखका सांसद् पार्वतीकुमारी विसुन्खे र सुर्खेत–१ का सांसद ध्रुवकुमार शाही पनि पुगेका थिए । सामूहिक भेटमा उनीहरुले पार्टीको खस्कँदो अवस्था नै बताए  ।  

पार्टीभित्रको विग्रह फराकिलो बन्दै जाँदा त्यसको असर वडा तहसम्म परिसकेको कुरा आफूले राखेको बूढाले बताए । चैत ४ र ५ गते खनाल–नेपाल समूहले गरेको भेलामा देशभरिबाट नेता–कार्यकर्ता धुइरिएर आएको देखाउँदै आफूले नेताहरू मिल्नुको विकल्प नरहेको बताएको उनको भनाइ छ ।
‘नवौँ महाधिवेशनमा प्यानल बनाएर चुनाव लड्दा पार्टी तलैसम्म चिरा परेको छ’ सांसद राजबहादुर बूढाले भेटमा भनेको कुरा बताए, “अहिले विग्रह बढ्दै जाँदा आधारभूत तहसम्मै समानान्तर संरचना बन्न थालेका छन् । त्यसको असर अबको चुनावमा पर्छ, पार्टी विभाजन भएर चुनावमा गए एमालेको एक सिट पनि आउँदैन ।

प्रधानमन्त्री ओलीलाई सांसदहरुले माओवादी केन्द्र र एमाले मिल्दा पनि ३८ भन्दा बढी निर्वाचन क्षेत्रमा नेपाली कांग्रेससँग एक हजारको मात्रै मतान्तर रहेको बताए । ‘एमालेको वडा–वडामा दुईवटा समूह तयार भएको छ । एकले अर्कालाई असहयोग गर्ने, हराउने अवस्था आउँछ । त्यसो हुँदा कर्णालीमा एक सिट जित्ने अवस्था छैन । सुदूरपश्चिममा पनि त्यस्तै छ । प्रदेश–१ मा पनि त्यस्तै अवस्था छ’ सांसद बूढाले प्रधानमन्त्रीलाई भनेको कुरा बताए । 

उनले भने, ‘मैले यसो भनेपछि प्रधानमन्त्री गम्भीर बनेर सुनिरहनुभयो, चिन्तित पनि हुनुभयो र नआत्तिन हामीलाई सुझाव दिनुभयो ।’ उहाँले पार्टीलाई एकताबद्ध राख्न पहल भइरहेको पनि बताउनुभयो ।