प्रधानमन्त्रीको देशबासीका नाममा सम्बोधन : हल्ला फैलाएजसरी तत्काल लकडाउन हुँदैन

काठमाडौँ । प्रधानमन्त्री केपी शर्मा ओलीले हल्ला फैलाएजसरी तत्काल लकडाउन नहुने बताएका छन् । नयाँ वर्षको उपलक्ष्यमा देशबासीका नाममा सम्बोधन गर्दै प्रधानमन्त्री ओलीले बुधबार अरु कुनै विकल्प नरहेको अवस्थामा मात्रै लकडाउनबारे सोच्न सकिने बताएका हुन् ।

‘कतिपयले आज नै लकडाउन भोलि नै लकडाउन गर्छ भनेर हल्ला फैलाए । तर सरकार सकेसम्म लकडाउन चाहँदैन,’ उनले भने, ‘विश्वका अन्य मुलुकहरु महामारी ह्वातै फैलिए लकडाउनको सहारा लिन बाध्य छन् । तर हामी अरु विधिबाट परिस्थिति बिग्रन नदिऔँ भन्ने चाहन्छौँ । मैले लकडाउन गर्ने धम्की दिए भनेर पनि भने । तर, परिस्थिति बिग्रिए मात्र सरकारले लकडाउन गर्छ भन्ने स्पष्ट पार्न चाहन्छु ।’ 

उनले सावधानी अपनाउने हो भने जनजीवन पनि सामान्य बन्न सक्ने बताए । आफूले लकडाउनको धम्की दिएको भनेर गरिएका दाबी पनि तथ्यहिन रहेको उनले बताए । प्रधानमन्त्री ओलीले भने, ‘महामारी ह्वात्तै बढ्यो र अरु विकल्पले काम गर्न सकेन भने लकडाउन हुन पनि सक्छ । तर त्यो अन्तिम विकल्प हो ।’

उनले सम्बोधनको क्रममा भने, ‘आलोचना गर्नेहरुले केही भएन भनेका छन् । तर हामीले भविष्यप्रति आशा र विश्वास जगाउने काम गरेका छौँ । रानीपोखरी बनायौँ, अब धरहरा पनि तयार भइसकेको छ ।’उनले सहकार्य र समन्वयको भूमिकामा जोड दिए पनि संसद चल्न नदिइएको आरोप लगाए । एमसिसीलाई संसदमा रोकिएको भन्दै उनले आलोचना गरे ।