२७ महिनाभित्रै यस्तो बन्नेछ भरतपुर महानगरको सिटी हल !

चितवन । चितवनको भरतपुर महानगरको गौरवको आयोजनाभित्र पर्ने सिटी हल अन्तर्राष्ट्रिय स्तरको नमुना मोडेलमा बन्ने भएको छ ।

भरतपुर–१० स्थित जिल्ला समन्वय समितिको कार्यालय पछाडि  ४ बिघा ४ कठ्ठा जग्गामा धमाधम सिटी हल निर्माणको काम भइरहेको निर्माण पक्षले जनाएको छ । महानगर प्रमुख रेनु दाहालले आज सिटी हल निर्माणको अनुगमन गर्दै निर्माण पक्षलाई समयमै काम सक्न निर्देशन दिएकी छन् । 

२७ महिनामा निर्माण सम्पन्न गर्नेगरी ८७ करोड ८८ लाख ८८ हजार ८८८ रुपैयाँ लागतमा ठेकेदार कम्पनीसँग सम्झौता भएको हो । ठेकेदार कम्पनी इण्डो–सगुन–रौताहा जेभीले यतिबेला रातदिन सिटी हल निर्माणको काम गरिरहेको छ । ६ हजार ५०० वर्गमिटर सिटी हलले ओगट्छ । सिटी हलको उचाइ २५ मिटरको हुनेछ ।  केन्द्र सरकारको ८७ करोड ८८ लाख रुपैयाँ लागतमा भरतपुरमा सिटी हल निर्माणको काम थालिएको हो । 

सात हजार १०० क्युफिटमा मुख्य सभा हल निर्माण हुनेछ  । सिटी हल दुई हजार मानिस अट्ने क्षमताको रहन्छ । छेउछाउँमा पनि २०० जना अट्ने क्षमताको हल बन्नेछ । यस्तै पार्किङको व्यवस्था र सौन्दर्यताको लागि फाउन्टेन पनि निर्माण गरिनेछ ।