गाईगोठबाट शुरु भएको आगलागीबाट ४ वटा घर जलेर नष्ट

राजविराज । सप्तरीको हनुमाननगर कंकालिनी नगरपालिकास्थित सकरदही टोलमा आगलागी हुँदा चारवटा घर जलेर नष्ट भएका छन् ।

कंकालिनी २, सकरदहीका जगन सुतिहारको गाईगोठबाट सुरु भएको आगलागीमा परी नारायण सुतिहार, दुर्गानन्द सुतिहार र सुमित मगरदैताको घर आज बिहान जलेर नष्ट भएको वडाध्यक्ष सन्तोष गोइत यादवले जानकारी दिए ।

आगलागीबाट खाद्यान्न, लत्ताकपडा, नगद जिन्सी र भाँडाकुडा गरी करिब २० लाख रुपैयाँभन्दा बढीको क्षति भएको उनले बताए । स्थानीय बासिन्दा, वारुणयन्त्र, सशस्त्र प्रहरी बल र नेपाल प्रहरीका टोलीको प्रयासमा आगो नियन्त्रणमा लिइएको हो ।