५ महिनापछि कोरोनाले मृत्यु भएकाको शव उत्खनन‍् गरी दाहसंस्कार

काठमाडौं । अर्घाखाँचीको मालारानी गाउँपालिका ४ खनका ५७ वर्षीय यमप्रसाद खनालको गत जेठ २८ गते मृत्यु भएको थियो । उपचार गर्न बुटवल गएर फर्किने क्रममा खनालको बाटैमा ज्यान गएपछि सेनाले शव व्यवस्थापन गरेको थियो । खनालको स्वाब परीक्षण गर्दा कोरोना पोजेटिभ देखिएको थियो । 

उनै खनालको शव परिवारले यही कात्तिक १५ गते निकालेर खुला रुपमा दाहसंस्कार गरेका छन् । आफन्त प्रकाश खनालले झण्डै ५ महिनामा शव उत्खनन गरी हिन्दू परम्पराअनुसार अन्त्येष्टि गरिएको बताए । 

‘त्यसबेला शव गाड्ने स्थल समेत नपाएर घरनजिकै गाड्नुपरेको थियो’, उनले भने,  ‘यसरी हुँदैन, आत्मशान्तिका लागि परम्पराअनुसार नै अन्तिम संस्कार गर्नुपर्छ भनेर शव निकाल्यौं ।’ माटोमा गाडिएको शव केही सडेको थियो ।

पाँच घण्टा लगाएर निकालिएको शव पोको पारी परिवारका सदस्यले अन्तिम श्रद्धाञ्जली दिए । २४ जना मलामीसहित रिडी नदी घाटमा अन्तिम संस्कार गरिएको हो । अन्न्पूर्ण पोस्टमा खबर छ ।