भरतपुर अस्पताललाई रेडक्रसको सहयोग

चितवन । नेपाल रेडक्रस सोसाइटीले कोकाकोला फाउण्डेसनबाट प्राप्त स्वास्थ्य सामग्री बुधबार एक समारोहबीच भरतपुर अस्पताललाई हस्तान्तरण गरेको छ । रेडक्रसले मास्क, रबरका जुत्ता, ह्यान्ड स्यानिटाइजर र हात धुने साबुन हस्तान्तरण गरेको हो ।

नेपाल रेडक्रस चितवन शाखा सभापति ज्ञानशाली न्यौपानेले अस्पतालका अध्यक्ष डा. भोजराज अधिकारी र मेडिकल सुपरिटेन्डेन्ट श्रीराम तिवारीलाई सहयोग सामग्री हस्तान्तरण गरेका थिए । सहयोग सामग्री लिएपछि अस्पतालका अध्यक्ष डा. अधिकारीले सहयोगका लागि नेपाल रेडक्रसलाई धन्यवाद दिए ।

सहयोग हस्तान्तरण कार्यक्रममा उपस्थित नेपाल रेडक्रस सोसाइटी केन्द्रीय कार्यालयका निर्देशक दिव्यराज पौडेलले सात वटै प्रदेशका मुख्यमुख्य अस्पतालमा डेढ करोड रुपैयाँ बराबरका स्वास्थ्य सामग्री सहयोग गरिने र यस्तो सहयोग सामग्रीमा भेन्टिलेटर समेत रहेको जानकारी गराए ।