कविता : एकथान नागरिकता

- सुरेन्द्र अस्तफल

सरकार

हामीसित तपाईको पञ्जापत्र भएको

एकथान नागरिकता छ

जो कहिले

राहतको लागि काम लाग्छ

जो कहिले

नेपाली हुँ भनेर सीमा नाकामा

हजुरलाई देखाउन काम लाग्छ

यसले कहिल्यै

शिक्षा, स्वास्थ्य मौलिक अघिकार हो भनेर

हजुरहरूलाई तर्साउँदैन

जो कहिलेकाहीँ

औठाछाप लगाउँदा

हजुरहरुको लागि

चुनावको बेला काम लाग्छ

जो कहिलेकाहीँ

हजुरको जुनाफमा

रेमिट्यान्स टक्र्याउँन

पासपोर्ट बनाउँदा काम लाग्छ

अलि बाँचिएछ भने सरकार

वृद्धभत्ता थाप्न काम लाग्छ

सबैभन्दा बढी त

हजुरकै लागि मसाज गर्न काम लाग्छ ।

सरकार एकथान नागरिकता बाँडेर

शासकको गुड्डी हाँकिरहन्छ कहिलेसम्म ?